Нурлатта коррупциягә каршы комиссия утырышы узды
Бүген Нурлат районында коррупциягә каршы эшне координацияләү буенча комиссия утырышы узды. Нурлат районы Башлыгы җитәкчелегендәге комиссия әгъзалары берничә мөһим мәсьәләне карадылар. Район башлыгының коррупциягә каршы тору мәсьәләләре буенча ярдәмчесе Рафис Нигъмәтуллин декларация кампаниясе тәмамлануга ике атнадан артык кына вакыт калып баруын искәртте. Ул җитәкчеләрне декларацияләрне тутырганда аеруча игътибарлы булырга чакырды, чөнки узган ел хаталар булган очраклар күзәтелгән.
Район финанс-бюджет палатасының керемнәрне фаразлау һәм анализлау бүлегенең баш белгече Ирек Сибгатуллин бюджет акчаларын максатчан куллану һәм рациональ куллану буенча эчке финанс контролен гамәлгә ашыру турында сөйләде.
Районның авыл хуҗалыгы һәм азык-төлек идарәсе башлыгы Ирек Шәрәфетдинов чыгышы ЛПХ, игенчелек һәм терлекчелекне үстерүгә алынган федераль һәм республика субсидияләрен кулланганда коррупция факторларын булдырмауга кагылды. Ирек Минсалихович билгеләп үткәнчә, тикшерүләр барышында коррупцион характердагы бозулар ачыкланмаган.